Header AD

നാഗചൈതന്യയെ ട്രോളില്‍ മുക്കി മലയാളി ട്രോളന്‍മാര്‍, തിരിച്ചടിച്ച് തെലുങ്ക് ട്രോള്‍ പേജുകള്‍, പ്രേമം ട്രെയിലറിന്റെ കമന്റ് ബോക്‌സിന് താഴിട്ടു

പ്രേമം തെലുങ്ക് റീമേക്ക് ചര്‍ച്ചകള്‍ തുടങ്ങിയത് മുതല്‍ മലയാളം പതിപ്പുമായുള്ള താരതമ്യവും തുടങ്ങിയിരുന്നു. ഫസ്റ്റ് ലുക്കും ആദ്യ ഗാനവും വന്നതോടെ തെലുങ്ക് റീമേക്കിനെതിരെ പരിഹാസവും ട്രോളുകളും പ്രവഹിച്ചു. നിവിന്‍ പോളിയുടെ ജോര്‍ജ്ജ്, സായ് പല്ലവിയുടെ മലര്‍ എന്നീ കഥാപാത്രങ്ങളെ തെലുങ്കില്‍ അവതരിപ്പിക്കുന്ന നാഗചൈതന്യ, ശ്രുതി ഹാസന്‍ എന്നിവരുടെ പ്രകടനത്തെ ചൊല്ലിയായിരുന്നു പരിഹാസവും ട്രോളുകളും.
മലരേ എന്ന ഗാനത്തിന്റെ തെലുങ്ക് വേര്‍ഷന്‍ എവരേ എന്ന് തുടങ്ങുന്ന ഗാനത്തിലെ വീഡിയോ സോംഗ് പുറത്തിറങ്ങിയത് പിന്നാലെ സ്‌ക്രീന്‍ ഷോട്ടുകളും ട്രോള്‍ പോസ്റ്റുകളുമായി മലയാളി ട്രോളന്‍മാര്‍ക്കൊപ്പം തമിഴ് ആരാധകരും പങ്കാളികളായി. rippremam എന്ന ഹാഷ് ടാഗ് ട്വിറ്ററിലും ഫേസ്ബുക്കിലും ട്രെന്‍ഡിംഗുമായി. ഇപ്പോഴിതാ പ്രേമം തെലുങ്ക് പതിപ്പിലെ പുതിയ ഗാനവും ട്രെയിലറുമാണ് ട്രോളന്‍മാരുടെ ആക്രമണത്തിന് ഇരയായിരിക്കുന്നത്.
നിവിന്‍ പോളി തന്മയത്വത്തോടെ കൈകാര്യം ചെയ്ത നായകകഥാപാത്രത്തെ നാഗചൈതന്യ അമിതാഭിനയത്താല്‍ പരിഹാസ്യമാക്കുന്നുവെന്നാണ് ട്രോള്‍ പോസ്റ്റുകളിലെ പ്രധാന ആക്ഷേപം. എന്നാല്‍ അതിഭാവുകത്വം നിര്‍ബന്ധമായ തെലുങ്ക് സിനിമകളില്‍ ഇതൊരു പുതിയ കാഴ്ചയല്ല എന്ന പക്ഷവും ഉണ്ട്. മലയാളം ട്രോളുകള്‍ ട്വിറ്ററുകളിലും ഫേസ്ബുക്കിലും പ്രവഹിച്ചതോടെ ട്രെയിലറിന്റെ യൂട്യൂബ് ചാനലില്‍ കമന്റ് ബോക്‌സ് പൂട്ടി. നേരത്തെ എവരേ എന്ന ഗാനത്തിനെതിരെ വിമര്‍ശനം ഉയര്‍ന്നപ്പോഴും കമന്റ് ചെയ്യാനുള്ള ഓപ്ഷന്‍ ഓഫ് ഡിസേബിള്‍ ചെയ്തിരുന്നു. മലയാളത്തിലെ ട്രോളുകള്‍ ചുട്ടമറുപടിയുമായി തെലുങ്ക് ട്രോള്‍ പേജുകള്‍ രംഗത്തെത്തിയിട്ടുണ്ട്. നാഗചൈതന്യയുടെ സമീപകാലത്തെ മികച്ച അഭിനയമാണ് പ്രേമത്തിലേത് എന്ന രീതിയിലാണ് പോസ്റ്റുകള്‍. ശ്രുതി ഹാസനെ പരിഹസിക്കുന്നവരെയും ഈ ട്രോള്‍ പേജുകള്‍ കൈകാര്യം ചെയ്തിട്ടുണ്ട്. നായികമാരെ അവതരിപ്പിക്കുന്നതില്‍ തെലുങ്ക് സംവിധായകരെ പിന്നിലാക്കാന്‍ മറ്റാര്‍ക്കും കഴിയില്ലെന്നും ചില ട്രോളുകളില്‍ പറയുന്നു.
ഒക്ടോബര്‍ 7നാണ് തെലുങ്ക് പ്രേമം തിയറ്ററുകളിലെത്തുന്നത്. മലയാളം പതിപ്പില്‍ നിന്ന് ചെറിയ മാറ്റങ്ങളോടെയാണ് റീമേക്ക്. ചന്ദു മൊണ്ടേറ്റിയാണ് സംവിധായകന്‍.
തെലുങ്ക് പതിപ്പില്‍ രാജേഷ് മുരുഗേശനൊപ്പം ഗോപിസുന്ദറും ഗാനങ്ങള്‍ ഒരുക്കിയിരിക്കുന്നു. മജ്‌നു എന്ന് ആദ്യം പേരിട്ടിരുന്ന ചിത്രം പിന്നീട് പേര് പ്രേമം എന്ന് തന്നെയാക്കുകയായിരുന്നു. മലയാളത്തില്‍ നാല് കോടി മുതല്‍മുടക്കില്‍ ഒരുക്കിയ ചിത്രം തെലുങ്കില്‍ 20 കോടി ബജറ്റിലാണ്.
മലര്‍ എന്ന സായ്പല്ലവി കഥാപാത്രത്തെ തെലുങ്കില്‍ ശ്രുതി ഹാസനാണ് അവതരിപ്പിക്കുന്നത്. സിതാരാ എന്ന പേരിലാണ് ഈ കഥാപാത്രം. അനുപമാ പരമേശ്വരന്‍ അവതരിപ്പിച്ച മേരി തെലുങ്കില്‍ ഹരിത എന്ന് പേരുമാറിയപ്പോഴും നായിക മാറിയില്ല. മഡോണ സെബാസ്റ്റിയനും മലയാളത്തില്‍ ചെയ്ത അതേ റോളിലുണ്ട്. പ്രേമം മലയാളം പതിപ്പിലെ എട്ട് ഗാനങ്ങളില്‍ നിന്ന് മൂന്ന് ഗാനങ്ങള്‍ തെലുങ്കില്‍ നിലനിര്‍ത്തിയിട്ടുണ്ട്. വിജയവാഡയിലും വിശാഖപട്ടണത്തും ഗോവയിലും വിദേശത്തുമായാണ് തെലുങ്ക് പ്രേമം ചിത്രീകരിച്ചിരിക്കുന്നത്. സിതാരാ എന്റര്‍ടെയിന്‍മെന്റാണ് നിര്‍മ്മാണം.


NEWS FROM- SOUTHLIVE.IN
നാഗചൈതന്യയെ ട്രോളില്‍ മുക്കി മലയാളി ട്രോളന്‍മാര്‍, തിരിച്ചടിച്ച് തെലുങ്ക് ട്രോള്‍ പേജുകള്‍, പ്രേമം ട്രെയിലറിന്റെ കമന്റ് ബോക്‌സിന് താഴിട്ടു നാഗചൈതന്യയെ ട്രോളില്‍ മുക്കി മലയാളി ട്രോളന്‍മാര്‍, തിരിച്ചടിച്ച് തെലുങ്ക് ട്രോള്‍ പേജുകള്‍, പ്രേമം ട്രെയിലറിന്റെ കമന്റ് ബോക്‌സിന് താഴിട്ടു Reviewed by Ashith kp on 1:11 AM Rating: 5

No comments

Post AD